Vom 6. bis zum 9. März feiert Basel Fasnacht und hat "drei Daag offe"; dies ist das diesjährige Fasnachts-Sujet. Und so wurde es zusammen mit der Blaggedde vorgestellt:

Drei Daag offe

Mir Baasler sygen alles Gnoorzi,
ooni Wältglass, ooni Pfuus.
Es kenn kuum ebber soo vergnoorzt syy
wie miir in unserem Schnäggehuus.
Das isch die allgemaini Mainig
vo änedraa am Hauestai.
Miir aber sinn is alli ainig:
Die Mainig isch is ainerlai.
So kemmet doch emol ko luege
wenn s Martinsgleggli vieri schloot.
Denn gheit au Baasel us de Fuege.
Denn saage miir, wo s duuregoot.
Denn kemme d Bebbi us sich uuse.
Denn lääre d Bebbi iire Gropf
und leere alle zämme s Gruuse
us ganzem Häärz – und us em Kopf.
Denn sinn und hämmer DREI DAAG OFFE,
wie s daas Joor s Faasnachts-Motto sait.
D Blaggedde zaigt, so wämmer hoffe,
die ganzi Faasnachts-Heerligkait.
Dr DANIEL VETSCH het si erfunde.
Dr DANIEL MÜLLER het si präggt.
Zwai Moonet duurt jetz d Eererunde,
wo me sy sich an Tschoope stäggt,
zem zaige, wie mir s Hirni lifte
und au e Batze oder mee
in d Faasnachtsglyggekasse stifte.
Me danggt ganz häärzlig!
s Comité